تبدأ قصة الفيديو كليب بلقاء المعلم ابو الروس مع مساعده بطاطا في الاستوديو استعدادا لتصوير الكليب ويدور بينهما الحوار التالي :

ابو الروس : ولا يابطاطا .

بطاطا : نعم يامعلم .

ابوالروس : قلت لك اسمي الاستاذ ياحيوان ، انسى كلمة المعلم دي خالص ، امشي انجر ياد عالعتبة هات لنا دستين قمصان نوم عشان يلبسوهم البنات في تصوير الكليب بتاع انهارده .

بطاطا : بقولك ايه يامعلم ، قصدي يااستاذ ابوالروس ، الدنيا انهاردة حر قوي ، والمشوار بعيد ، ماتخليهم يصوروه كدا وخلاص .

ابوالروس : يعني ايه كدا وخلاص ياد ؟

بطاطا : كدا وخلاص يعني كدا وخلاص ، افهمها انت بقى يااستاذ .

ابو الروس : لا لا لا ، استغفر الله ، كله الا كدا ، انت عارف شعارنا ، لا للاغراء ، نعم للفن الهاتف ، وبعدين انت عاوز الرقابة تودينا في داهية ؟؟؟

بطاطا : أنا ماليش دعوة ، انا قلت اللي عندي وخلاص ، بس انت كنت هتكسر الدنيا بالحركة دي ياأستاذ .

ابوالروس : طب بطل رغي وخد العربية النقل عشان تروح تجيب لنا نقلتين بنات عشان خلاص فاضل ساعة ونبتدي التصوير .

بطاطا : طب مين فيهم اللي هتغني يااستاذ ؟

ابوالروس : هو انت كل مرة تسال السؤال ده ؟ اي واحدة تقف قدام وتلبس لون مختلف والباقي يقفوا وراها يتمايلو ، والمسجل شغال ، انت مخك تخين ليه ياد ؟

بطاطا : معلش يااستاذ ، احنا بنتعلم منك ، طب بالاذن بقى أما اروح اشحن البضاعة .
ينصرف ثم يعود بعد ثوان مذعورا وهو يصرخ في فزع : الحقونيييييييييي ، تعبان ... تعبان .

ابوالروس : هو فين دا ياد ؟

بطاطا : على باب الاستوديو يامعلم وواقف على حيله وسادد الباب وشكله يخوف قوي .

ابوالروس ينظر تجاه الباب : يانهاراسود ، دا صحيح ، دا شكله مخيف قوي ، طب روح نادي عمك رفاعي الحاوي من عالقهوة بسرعة ، بيقولوا انه بيعرف يتفاهم مع التعابين .

يخرج بطاطا من الشباك ويعود ومعه عم رفاعي ، الذي يدخل في وقار ثم يهمهم ببعض العبارات ثم يبدأ في الحديث مع الثعبان الذي يجاوبه باشارات من راسه ، وبعد حوار قصير بينهما يغرق عم رفاعي في الضحك فيسأله ابو الروس : ايه ياعم رفاعي ، قال لك ايه التعبان دا ؟

رفاعي : دا مش تعبان عدم المؤاخذة ، دي حية ، وآنسة كمان .

ابوالروس : ياعم آنسة ولامطلقة ، موتها وخلصنا .

رفاعي يغرق في الضحك مرة ثانية ويقول : اصلها سمعت كلامكو عن الفيديو كليب وبتستسمحك انها تظهر فيه عشان نفسها تبان في التليفزيون .

ابو الروس : تظهر فيه تهبب ايه دي كمان ؟ دي ماعندهاش مؤهلات خالص .

رفاعي : هاأو ، مؤهلات ايه لامؤاخذة ، عليا ولا متوسطة ؟

ابوالروس : انت بتتريق ؟ ايوه لازم طبعا يكون عندها مؤهلات عليا ومتوسطة وتحت المتوسطة كمان ، التلاتة أهم من بعض ، عشان تعجب الجمهور ، هو احنا بنلعب ؟

رفاعي يجري حوارا مع الحية بنفس الطريقة ثم يوجه الكلام لابو الروس قائلا : طيب هي بتقولك انها صحيح ماعندهاش المؤهلات دي بس مستعدة تتلوى وتعمل حركات لولبية وتتشال وتتهبد طول الكليب ولا أجدع واحدة من البنات اللي عندك .

ابوالروس يسأل مساعده : ايه رايك يابطاطا ، اهي حاجة جديدة اهه ؟؟؟

بطاطا يشير له باصابعه كمن يعد نقودا فيسال أبوالروس رفاعي : طب اسألها عاوزة تاخد كام .

رفاعي : لا ، اطمن ، هي يكفيها فار ميت في كل كليب ، بس الدفع مقدم .

ابوالروس : ايه دا ؟ الله يغم نفسك ياشيخ ........ يفكر ....... بس انا لسة مش مقتنع .

رفاعي ينظر للحية ويدور بينهما حوار قصير ثم يقول لابو الروس : هي بتقولك انها كمان فيها ميزة مش موجودة في اي بنت عندك .

ابوالروس : ايه هي دي ان شاء الله ؟

رفاعي : بتقولك انها لو ظهرت كدا خالص خالص في الكليب الرقابة مش هتقولك حاجة ، وشوية شوية المسألة تمشي عالباقيين ، وفتح عينك تاكل ملبن .

ابو الروس يوافق وياخذ الحية بالحضن كالمعتاد عربون صداقة ، وانتظروا الكليب قريبا .

وآسف للاطالة .

اما نشوف الردود